咖啡奶茶肥唔肥?

好多朋友都問究竟咖啡奶茶係唔係好肥。 其實齋啡同齋紅茶本身係唔肥嘅，肥嘅係入面嘅糖同奶。 一杯忌廉mocha嘅卡路里已經高過我開比大家餐單嘅一餐卡路里份量咖啦！

好多時出街飲嘅咖啡例如mocha、 cappuccino、latte 脂肪含量都好高。而上面嘅忌廉同朱古力碎，更加係致肥嘅主要原因 。即使無忌廉同朱古力碎，亦唔代表唔肥。大家可能未必知道，低脂奶係好難打到泡咖，所以泡沫咖啡用嘅奶好少係低脂。 

至於奶茶，通常用高脂淡奶冲嘅奶茶先至夠香同滑。 所以大家喺飲一杯咖啡奶茶既同時亦都不知不覺咁吸收咗好多脂肪。

最大嘅問題係， 飲一杯呢啲咖啡奶茶大家係唔會覺得飽嘅。 因為滿足感唔夠， 大家好多時會再食其他食物， 結果係卡路里嚴重超標。